L'Uniun Gieus olimpics e paralimpics d'enviern en Svizra 2038 ha inoltrà tranter la fin da settember 2025 ed ils 5 da december in dossier cumplessiv a l'Uffizi federal da sport. Quel preschenta tut las parts essenzialas dal project sco il concept, l'ierta, la persistenza, ils lieus d'occurrenza, la logistica, il transport, la segirezza e la finanziaziun.

Uss èsi l'incumbensa dal Departament federal da defensiun, protecziun da la populaziun e sport (DDPS) da lantschar la consultaziun e preschentar al parlament il messadi davart la decisiun da princip e la decisiun da planisaziun. La finamira è da nizzegiar la schanza dal dialog privilegià e da furnir la primavaira 2027 tut las garanzias necessarias al Comité olimpic internaziunal (IOC).

En il decurs dals proxims mais vegn l'uniun a sclerir ils puncts averts cun l'IOC per pudair respunder a tut las dumondas da detagl enfin l'entschatta dal 2027.

Ina differenza principala è il dialog privilegià. Quai signifitgescha che la Svizra na sto betg sa far valair envers autras candidaturas, mabain stat cun sia candidatura en contact exclusiv cun l'IOC.

In'ulteriura differenza essenziala è l'organisaziun decentrala: Cuntrari a las candidaturas precedentas èsi previs da realisar ils gieus en plirs lieus d'occurrenza en l'entir pajais. Uschia na vegnan integradas betg mo tut las regiuns linguisticas che pon era profitar dals gieus, mabain era las grevezzas vegnan repartidas meglier. Quai promova il sustegn e la persistenza dals gieus.

Plinavant vegn Switzerland 2038 finanzià, auter che anteriuras candidaturas svizras, principalmain cun meds privats ed i na duai dar nagina garanzia da deficit da la Confederaziun.

Sco basa da lavur ha servì il studi davart la realisabladad Switzerland 203X. L'idea è da s'orientar als lieus d'occurrenza dals differents campiunadis mundials ed europeics per nizzegiar il meglier pussaivel las infrastructuras ed expertisas gia existentas.

Il nov Venue Master Plan (VMP) 2038 sa basa sin quests plans. Cun adattaziuns specificas duai el porscher a tut las persunas participadas in eveniment olimpic autentic, ademplir las pretensiuns da l'IOC e crear in niz maximal per l'entira Svizra. A medem temp resta il VMP fidaivel al concept da l'organisaziun decentrala, uschia che l'entir pajais vegn a pudair far part dals gieus.

Il project naziunal preschentà da la Svizra il november 2023 per ils Gieus olimpics e paralimpics d'enviern ha persvadì il Comité olimpic internaziunal (IOC) da ses potenzial. Quai è stà pussaivel grazia al vast sustegn da la Confederaziun, dals chantuns e da las citads pertutgadas. Sin quai ha l'IOC, che ha sia sedia dapi il 1915 a Losanna, offert a la Svizra d'entrar en in uschenumnà «dialog privilegià» per ils gieus 2038.

Cun entrar en il dialog privilegià cun la Svizra ha l'IOC prendì ina decisiun extraordinaria e mess uschia in fitg ferm signal. L'IOC s'oblighescha da cuntinuar il dialog exclusiv cun la Svizra e da reservar per la Svizra la planisaziun dals gieus d'enviern 2038 enfin la fin dal 2027. Il status «Privileged Dialogue» signifitga che la Svizra ha temp enfin la fin dal 2027 d'optimar ses dossier e da sa segirar ils sustegns necessaris.

Cun sia agenda 2020+5 e cun adattar ils criteris d'attribuziun e da realisaziun («New Norm») ha l'IOC creà las basas per ina nova èra. Sin quest fundament è vegnida sviluppada la visiun dal project «Switzerland 2038»: La Svizra duai sco emprim pajais ospitant surpigliar ina rolla da pionier cun ils Gieus olimpics e paralimpics d'enviern en plirs lieus d'occurrenza, concepir a moda activa ed innovativa ina nova èra e procurar che la societad haja in niz persistent da quest project. 

La Svizra fiss l'emprim pajais ospitant da l'istorgia che organisescha Gieus olimpics e paralimpics d'enviern. Quest concept naziunal reunescha tut las quatter regiuns linguisticas dal pajais e promova la coesiun. 

Per l'Uniun Switzerland 2038 signifitga quai da reparter ils lieus d'olimpia sin tut las quatter regiuns linguisticas dal pajais.

L'IOC ha adina accentuà ch'igl è fitg impurtant per el d'avair gia baud il sustegn politic. Cun la decisiun dal Cussegl federal da l'atun 2024 ha quel dà in messadi cler a l'IOC: La Svizra è disposta e pronta d'organisar ils Gieus olimpics e paralimpics d'enviern, sch'ils scleriments approfundants conferman fin l'onn 2027 ch'ina candidatura è pussaivla sut las cundiziuns da basa definidas. Quai dat al project la legitimaziun necessaria sin il pli aut stgalim politic.

Sco tar in'exposiziun naziunala u in campiunadi europeic da ballape vegnan intgins chantuns ed intginas vischnancas ad esser participads directamain sco lieus d'occurrenza ed auters betg, ma ins po sa participar ad in project svizzer ed en cas da basegn nizzegiar l'eveniment per atgnas purschidas localas (champs da trenament, Public Viewing, projects d'activitad, etc.). 

In tal eveniment grond promova projects en l'entir pajais. L'entira populaziun po sa participar a moda activa, independentamain dal lieu da domicil, quai han ins vis er a chaschun dals Gieus olimpics da stad a Paris 2024 u a chaschun da l'UEFA Women's EURO. Ultra da quai animescha ina tala occurrenza ils umans da far dapli sport, quai ch'è bun per la sanadad da tut las Svizras e tut ils Svizzers.

Differents partenaris naziunals han gia confermà lur interess d'examinar sinergias pussaivlas en cas d'ina attribuziun dals gieus a la Svizra. Quai vala per la Conferenza da las directuras e dals directurs chantunals da l'educaziun publica sco era per la Conferenza da las incumbensadas e dals incumbensads chantunals da sport e las universitads svizras. Quai mussa che l'entira Svizra è interessada da collavurar e da profitar dal project Switzerland 2038.

La finanziaziun dal budget total da CHF 2,2 milliardas vegn cuverta per gronda part da l'IOC e da meds privats. Il maun public vegn a contribuir maximalmain 18%. La Conferenza da las directuras e dals directurs chantunals cumpetents dals gieus per daners ha approvà ils 24 da november ils 60 milliuns dumandads per ils gieus paralimpics. Ils 15% restants vegnan finanziads da la Confederaziun, dals chantuns e da las vischnancas en furma da subvenziuns sco quai ch'ellas èn usitadas era per autras occurrenzas da sport impurtantas. La Confederaziun è vegnida dumandada per CHF 190 miu. sur in temp da 10 onns.

In'enquista represchentativa realisada il 2023 da l'Institut independent gfs.bern ha mussà in vast sustegn: 67 pertschient da la populaziun svizra approveschan gieus olimpics e paralimpics d'enviern en Svizra. L'Institut gfs.bern fa regularmain era las enquistas per las votaziuns federalas dal pievel.

La grondezza da l'enquista cun var 1'000 persunas interrogadas correspunda als standards scientifics ed è in cumpromiss cumprovà tranter custs ed expressivitad. Per garantir la represchentativitad per l'entira populaziun svizra èn las datas da basa da l'enquista da gfs.bern vegnidas evaluadas tenor caracteristicas sociodemograficas sco vegliadetgna, schlattaina, regiun linguistica, furmaziun ed appartegnientscha ad ina partida.

La persistenza è in element central da la planisaziun, organisaziun e realisaziun da gieus olimpics e paralimpics. Ils gieus dal futur duain s'integrar en il context dals lieus d'occurrenza e nizzegiar l'infrastructura existenta. Ils gieus a Paris l'onn 2024 èn vegnids realisads per 95 pertschient cun infrastructura existenta u temporara e per 98 pertschient cun energia da resursas regenerablas.

Cun il concept preschentà vulain e pudain nus en Svizra reducir las emissiuns sin in nivel bass e nizzegiar a medem temp ils gieus per promover la transfurmaziun en ina societad persistenta en differents secturs. Brisbane 2032 mussa en tge direcziun ch'i pudess ir cun ils projects e las collavuraziuns correspundentas tranter la regenza, l'economia, las organisaziuns per la protecziun da l'ambient e las vischnancas ospitantas.

L'idea è per exempel ch'ils lieus d'occurrenza pudessan promover il consum regiunal e rinforzar il diever da l'infrastructura tras la populaziun locala.

La constataziun che gieus olimpics e paralimpics n'èn mai persistents dal punct da vista ecologic, è insuffizienta ed ignorescha ils svilups dals ultims onns, per exempel en il sectur da las energias regenerablas u da la mobilitad. Ultra da quai na duess la persistenza ecologica mai vegnir considerada a moda isolada – la persistenza sociala ed economica è medemamain impurtanta.  

Vair è: Occurrenzas grondas han adina consequenzas ecologicas – pervi da las numerusas activitads da viagiar, dal grond basegn d'energia u era pervia da las emissiuns da glisch e da canera. Grazia a las cundiziuns da basa en Svizra essan nus dentant persvas da pudair reducir tant sco pussaivel las consequenzas ecologicas. Uschia profitescha il concept da transports per exempel da las pussaivladads excellentas dal traffic public en Svizra. E grazia a la forza innovativa da la Svizra èsi pussaivel da promover novas soluziuns, per exempel en il sectur da l'infrastructura intelligenta.

Per realisar gieus d'enviern uschè ecologics sco pussaivel dovri partenadis ed il sustegn da tut ils gremis participads. Igl è impurtant d'integrar las activitads ed iniziativas existentas sin plaun naziunal, chantunal e communal e da promover quellas grazia als gieus.

Switzerland 2038 duain daventar ils Gieus olimpics e paralimpics d'enviern ils pli persistents grazia a las premissas excellentas da la Svizra ed a la voluntad da nizzegiar ils gieus sco catalisatur per soluziuns innovativas e persistentas ed uschia promover la transfurmaziun ecologica dal sport e da la societad.

L'Uniun Gieus olimpics e paralimpics d'enviern Svizra 2038 fa da preschent tut il pussaivel per reunir ils acturs dal sport, da la politica e da l'economia e pussibilitar uschia a l'entira Svizra ed a nossas atletas ed a noss atlets da sa participar in di a gieus d'enviern en l'agen pajais.

L'Uniun Gieus olimpics e paralimpics d'enviern Svizra 2038 è vegnida fundada il november 2023 da Swiss Olympic, Swiss Paralympic e da las associaziuns olimpicas naziunalas dal sport d'enviern per promover il project e crear in post da contact per tut ils partenaris participads (Confederaziun, chantuns, vischnancas, IOC, etc.). Ella ha tenor ils statuts las suandantas incumbensas:

a) organisar e manar il dialog privilegià cun il Comité olimpic internaziunal (IOC) per la realisaziun da gieus olimpics e paralimpics d'enviern en Svizra l'onn 2038;

b) manar in eventual dialog specific cun il Comité olimpic internaziunal (IOC) per la realisaziun da gieus olimpics e paralimpics d'enviern en Svizra l'onn 2038;

c) preparar, purtar e promover sin plaun naziunal ed internaziunal la candidatura per ils Gieus olimpics e paralimpics d'enviern en Svizra l'onn 2038 en collavuraziun cun la Confederaziun svizra ed ils chantuns, las vischnancas e las citads;

d) en cas ch'ils gieus vegnan attribuids a la Svizra organisar e realisar ils gieus en collavuraziun cun l'IOC (sco concedent dals dretgs d'organisaziun) e cun corporaziuns publicas, v.d. la Confederaziun svizra, ils chantuns ospitants e las vischnancas pertutgadas, sco era cun organisaziuns e persunas privatas.