Ina clera maioritad da la populaziun svizra sustegna la candidatura

61 pertschient schessan gea

Entaifer quests 61 pertschient èn 33 pertschient cleramain per ils gieus olimpics e paralimpics d'enviern e 28 pertschient plitost persuenter. Da l'autra vart s'expriman 21 pertschient da las persunas intervistadas cleramain cunter ils gieus d'enviern e 13 pertschient plitost encunter. 4 pertschient èn anc indecisas.

Quest resultat mussa ch'ina clera maioritad è per ils gieus olimpics e paralimpics d'enviern, ma era ch'ina part da la populaziun n'ha anc betg fatg definitivamain sia opiniun e che questa opiniun dependa da l'ulteriura concepziun da la candidatura. Be 24 pertschient da las intervistadas e dals intervistads èn da l'avis che la Svizra na duaja betg realisar gieus olimpics e paralimpics d'enviern.

Ruth Wipfli Steinegger, co-presidenta Switzerland 2038:
«Igl è in ferm signal ch'ina clera maioritad da las Svizras e dals Svizzers stat davos la candidatura. A questa confidenza vulain nus satisfar cun planisar ils gieus a moda responsabla e credibla.»

Grafica Cumportament da votar Switzerland 2038: www.datawrapper.de/_/DmrQu/
(Embed-Code unter «Einbetten»)

La candidatura survegn gronda attenziun da la populaziun

Trais quarts da las intervistadas e dals intervistads inditgeschan d'avair udì da l'eventuala realisaziun dals gieus. Gia blers onns avant in'eventuala realisaziun è il tema pia preschent e fa part da la discussiun publica.

Bleras persunas san ch'ils gieus olimpics e paralimpics d'enviern èn planisads a moda decentrala e duain avair lieu en l'entira Svizra. Auters puncts centrals da la candidatura, sco per exempel ils aspects finanzials u il fatg ch'ils gieus dovran l'infrastructura existenta, èn percunter anc main enconuschents.

Il studi mussa er in grond interess per il sport d'elita e da prestaziun durant l'enviern: 77 pertschient da la populaziun han persequità en ina furma u l'autra ils gieus olimpics e paralimpics d'enviern 2026 a Milano-Cortina.

Ferms arguments en favur da la candidatura

Il studi conferma che la populaziun approvescha per gronda part ils arguments centrals da la candidatura. Ina fitg gronda maioritad (79 pertschient) è persvadida che la Svizra posseda l'infrastructura necessaria ed ina rait da mobilitad effizienta per realisar cun success in'occurrenza gronda internaziunala. Medemamain vegn in'occurrenza decentrala percepida sco fermezza, perquai ch'ella sa basa sin structuras existentas e sin experientschas cun occurrenzas internaziunalas (74 pertschient consentiment).

70 pertschient da las persunas intervistadas vesan ultra da quai ina plivalur per la societad. Per ellas èn ils gieus ina schanza per rinforzar la coesiun en il pajais e per colliar pli ferm las differentas regiuns linguisticas.

Spezialmain ferm è l'argument da la promoziun da la giuventetgna. Ina gronda maioritad da 74 pertschient è da l'avis che gieus olimpics e paralimpics d'enviern possian dar impuls positivs a giuvnas sportistas e giuvens sportists. 20 pertschient inditgeschan schizunt che quai saja per els il motiv principal en favur dals gieus olimpics e paralimpics d'enviern.

Plirs elements da tut quests arguments per la candidatura or dal studi correspundan als resuns en connex cun la consultaziun da la Confederaziun, tranter auter davart l'infrastructura, ils avantatgs per la societad e la promoziun dal sport.

Frédéric Favre, CEO da Switzerland 2038:
«La Svizra dispona da tut quai ch'è necessari per organisar gieus d'enviern ch'èn persistents e fan punts. Cun in'occurrenza decentrala nizzegiain nus las infrastructuras existentas ed il know-how local per entusiasmar in pajais per in project naziunal che collia ils umans sur ils cunfins linguistics e regiunals.»

Grafica Arguments a favur da la candidatura per ils gieus olimpics: www.datawrapper.de/_/EmGuY/
(Embed-Code unter «Einbetten»)

Puncts da critica duain dar impuls a la candidatura

Sper il consentiment mussa il studi era cleramain las resalvas da la populaziun. Quellas sa concentreschan sin temas centrals che han gia influenzà anteriuras candidaturas olimpicas. Cun la differenza che las candidaturas da pli baud eran previsas en singulas regiuns, entant che la candidatura actuala vegn inoltrada per l'emprima giada da l'entira Svizra.

Ina part da las intervistadas e dals intervistads (57 pertschient) tema ils ristgs finanzials ed ils eventuals deficits che stuessan la finala vegnir purtads dal maun public. L'uniun Switzerland 2038 prenda fitg serius questas vuschs e prevesa perquai in model finanzià per 82 pertschient cun daners privats. Era per in eventual deficit vegnan ad esser responsabels ils privats e betg il maun public.

Lenka Kölliker, co-presidenta Switzerland 2038:
«Damai che las garanzias da deficit da 200 milliuns francs na duessan betg vegnir concedidas dal maun public, prendain nus en vista ina finanziaziun privata. Nus sentin in ferm sustegn da l'economia ed avain plaschair da cuntanscher la finamira pli probabel gia ils proxims mais.»

Medemamain existan dubis, sche gieus olimpics e paralimpics d'enviern pon vegnir realisads a moda persistenta en vista a la midada dal clima (53 pertschient). Grazia a sia rait da traffic excellenta, en spezial il traffic public, e grazia a la clera intenziun da duvrar per ils gieus mo l'infrastructura existenta e da betg construir ina nova, ha la Svizra las meglras premissas per realisar ils gieus d'enviern a moda uschè persistenta sco pussaivel.

Plinavant vesa ina minoritad (47 pertschient) il model decentral cun egl critic, cunzunt tar la dumonda, schebain il caracter olimpic vegnia mantegnì. L'uniun Switzerland 2038 ha a chaschun da sia visita dals emprims gieus decentrals en l'istorgia a Milano-Cortina realisà questa sfida ed integrà las experientschas en la planisaziun.

Da princip na sa drizza la critica betg encunter la Svizra sco lieu d'occurrenza u cunter il concept da la candidatura. Plitost manifesteschan las resalvas ils svilups globals e las dumondas davart las finanzas e la persistenza. Tenor Switzerland 2038 èn quellas resalvas legitimas.

Facit

L'uniun Switzerland 2038 vesa ils resultats dal studi sco conferma per la via instradada. Ils resultats dattan er inputs prezius per sviluppar vinavant la candidatura. Ensemen cun partenarias e partenaris dal sport, da la cultura, da l'economia e da la societad vul Switzerland 2038 stgaffir la basa per ils gieus olimpics e paralimpics d'enviern che vegnan dabun a l'entir pajais.

Colliaziun al rapport final