«First country ever!»

Enfin ussa ospitavan citads resp. regiuns ils gieus olimpics e paralimpics. Da nov admetta il COI era candidaturas preschentadas sin basa naziunala.

La Svizra vul daventar sco emprim pajais dal mund in “Host Country” da gieus olimpics e paralimpcs d’enviern. Noss pajais è propi predestinà per questa midada da paradigma – e concepts locals na vegnan insumma betg pli en dumonda per Swiss Olympic. Quai munta: gieus d’enviern decentrals en l’entira Svizra, per l’entira Svizra. En tut las quatter regiuns geograficas e linguisticas dal pajais sut l’ensaina da l’uniun.

Ultra da l’infrastructura gia existenta sa sviluppa ils proxims onns era ina gronda cumpetenza organisatorica cun l’organisaziun da grondas occurrenzas da sport als lieus da concurrenza pertutgads. Da questas cumpetenzas d’organisaziun dad eveniments vulain nus profitar ed organisar la coordinaziun da las singulas disciplinas da maniera regiunala. 

Correspundentamain lantschan e portan las federaziuns naziunalas dals sports olimpics d’enviern per l’emprima giada ina candidatura ed èn involvadas dapi l’entschatta ferm en il process. I sa tracta pia d’in project naziunal dal sport per l’entira societad e per tut las regiuns da la Svizra.

La Svizra dispona da l’infrastructura necessaria ed ha ina gronda tradiziun ed experientscha cun organisar grondas occurrenzas da sport. Nus ans vulain basar sin quellas e profitar da l’expertisa dals numerus comités d’organisaziun locals che funcziuneschan bain. Nus ans basain sin lieus existents. La Svizra vul esser l’emprim pajais ospitant cun in project che unescha, che cumpiglia l’entir pajais. Ils lieus ospitants èn decentralisads e resguardan l’entira Svizra.