Switzerland 2038 beneventa il sustegn dal Cussegl federal

A chaschun d'ina conferenza da medias a Berna ha il Cussegl federal confermà oz ses sustegn per il project Switzerland 2038. Uschia survegn la candidatura svizra ulteriur support politic. La missiva deliberada furma la basa per las tractativas politicas en il Cussegl naziunal ed en il Cussegl dals chantuns.

Ina schanza unica per la Svizra

La Svizra ha la schanza d'organisar per l'emprima giada dapi il 1948 puspè gieus olimpics e paralimpics d'enviern. Il Privileged Dialogue concedì da l'IOC vala exclusivamain per la Svizra e dura enfin la fin dal 2027.

Ils mais passads èn stadas en il center la missiva dal Cussegl federal dal schaner 2026 e la consultaziun publica cun resuns per gronda part positivs. Cun la missiva dad oz ch'è vegnida publitgada in di avant l'Olympic Day – il di che vegnan festivadas en tut il mund las valurs dal moviment olimpic e promovida la participaziun sportiva per tut:tas – han ins cuntanschì in term politic impurtant.

Ruth Wipfli Steinegger, co-presidenta da Switzerland 2038, è cuntenta:
«Nus engraziain al Cussegl federal per la gronda confidenza en nossa lavur. Il messadi positiv è d'enorma impurtanza per l'ultima fasa dal Privileged Dialogue. Nus ans legrain sin ils discurs parlamentars e l'ulteriur dialog constructiv cun la politica, il sport e la societad.»

Frédéric Favre, CEO da Switzerland 2038, cumplettescha:
«La novitad ch'il Cussegl federal ha communitgà oz è in ferm signal per il sport svizzer e per nossa candidatura. Suenter las federaziuns da sport d'enviern e da stad, ils 10 chantuns e las 14 citads sustegna uss er il Cussegl federal quest project che fa punts per noss pajais. Quai conferma che Switzerland 2038 è in project credibel ed orientà vers l'avegnir – il medem mument dat il Cussegl federal in signal fitg positiv a noss parlament.»

Decisiuns politicas spetgadas enfin la fin dal 2026

Cun sia tenuta clera dad oz ha il Cussegl federal affirmà las ambiziuns da la candidatura svizra ed instradà il passagi en la proxima fasa. Cun la discussiun parlamentara vegninta dal Cussegl naziunal e dal Cussegl dals chantuns suonda in pass impurtant en in project naziunal che ha in vast sustegn e che vegn purtà cuminaivlamain dal sport, da la politica e da la societad. Il Parlament vegn probablamain a tractar questa fatschenta durant las sessiuns d’atun e d’enviern 2026. .

Parallelamain intensivescha l'uniun Switzerland 2038 ils discurs cun partenaris davart la finanziaziun privata – 82% dal budget d'organisaziun duain vegnir da meds privats.

Lenka Kölliker, co-presidenta da Switzerland 2038, constatescha:
«L'interess fin uss e las empermischuns finanzialas d'interpresas e da persunas privatas cumprovan la confidenza e conferman che Switzerland 2038 vegn percepì sco project persistent e persvadent.»

Grond sustegn per la candidatura svizra

Switzerland 2038 vegn sustegnì da 14 citads e 10 chantuns ch'èn spert sta:das persvadi:das dal project. Er en la populaziun chatta il project buna accoglientscha: Tenor in studi da gfs.bern s'expriman 61 % da las persunas dumanda:das a favur da Switzerland 2038.

Il grond consentiment mussa che la populaziun percepescha la plivalur sociala per la proxima generaziun sco argument central. Gieus en l'agen pajais creeschan identificaziun, motivaziun e stabilitad persistenta – tant per atletas ed atlets sco era per uniuns e federaziuns.

Ruth Metzler-Arnold, presidenta da Swiss Olympic, declera:
«Cun la decisiun odierna dal Cussegl federal survegn Switzerland 2038 uss er il sustegn uschè impurtant da la Regenza federala. Quai mussa ch'il project persvada il sport, la politica e la societad e co che Switzerland 2038 unescha tut:tas davos ina visiun cuminaivla che rinforza il sport svizzer a moda persistenta ed inspirescha las generaziuns vegnintas.»

Federaziuns da sport da gronda impurtanza

Il project vegn purtà da federaziuns da sport d'enviern svizras che han experientscha da blers onns cun occurrenzas grondas internaziunalas, sco l'ultim per exempel cun il campiunadi mundial da hockey il 2026 a Turitg e Friburg, l'onn passà cun il campiunadi mundial da biatlon a Lai sco era l'onn che vegn cun il campiunadi mundial da skis alpin a Crans-Montana ed il campiunadi europeic da skating a Losanna. Switzerland 2038 stat per professiunalitad, responsabladad ed ina planisaziun realistica. Ils vasts purtaders dal sectur da sport rinforzan la credibilitad dal project e mussan ch'il mund dal sport svizzer stat unanimamain davos il project.

Switzerland 2038 sa concentrescha consequentamain sin l'infrastructura existenta, promova la creaziun da cumpetenzas en il management d'events, rinforza l'inclusiun olimpica e paralimpica ed ha effect lunsch sur l'onn 2038 ora. Il legat a lunga vista per il sport sco era per l'entir pajais è d'interess central per il project – in'ierta che duai persister sur pliras generaziuns.

Il project rinforza la promoziun da la generaziun giuvna, la scolaziun ed il svilup a lunga vista da las structuras en il sport svizzer. Il studi da gfs.bern suttastritga a moda impressiunanta l'impurtanza da quest aspect: 74 % da la populaziun èn da l'avis che gieus olimpics e paralimpics d'enviern marcassan ina generaziun giuvna da sportistas e sportists e dessan impuls positivs per la giuventetgna e la societad.

Material disponibel
Video explicativ da la timeline e dals termins dal process:
www.switzerland2038.com/rm/project