Gieus olimpics e paralimpics d’enviern 2038 en Svizra èn dapli che mo in eveniment sportiv – quai è in project cuminaivel, che unescha ed inspirescha per e da la populaziun svizra.

S’inscuntrar, sa chattar, cuntanscher ina finamira da maniera cuminaivla, rinforzar l’identitad e projectar las valurs en il futur. Tuttas e tuts pon sa participar. Nus mettain en moviment la Svizra, nus mettain en moviment Olimpia. Il sport ha la funcziun da catalisatur per quai, el creescha emoziuns unicas, el construescha punts e collaziuns e rinforza nossa societad. Gieu olimpics d’enviern a chasa regalan in’experientscha unica en la vita, al sport svizzer ed a sias atletas ed a ses atlets d'elita che promovan l’identitad, sco era a l’entira populaziun svizra. Tuttas e tuts daventan part dal spiert olimpic en l’agen pajais e pon esser superbis da la via svizra che duai servir sco inspiraziun per l’organisaziun dals gieus en auters lieus.

Perquai èsi la finamira che tants umans e tants secturs sco pussaivel possian profitar da maniera directa ed indirecta. Quai entschaiva cun il concept naziunal che integrescha las parts e regiuns linguisticas da noss pajais e dat forza al spiert da cuminanza a la naziun fundada sin la voluntad. Perquai lessan nus crear in liom pli ferm cun ils gieus olimpics e paralimpics d’enviern e rinforzar era qua il sentiment da coesiun: ensemen essan nus ferms. Ensemen essan nus in team.

Cun nossa nova via svegliain nus emoziuns en l’entira Svizra, nus inspirain giuven e vegl, nus mobilisain noss know-how e nossa forza creativa. La Svizra sco naziun da sports d’enviern, las federaziuns dals sports d’enviern cun lur know-how tar la realisaziun da grondas occurrenzas da sport internaziunalas, la cultura da voluntaris, la forza innovativa e la democrazia directa en il cor da l’Europa pon prestar ina gronda contribuziun da manar en l’avegnir  il moviment olimpic e paralimpic. Cun gieus organisads da maniera raschunaivla e persistenta per tuttas e tuts. Il sport muventa noss pajais e metta impuls per noss vegnir.