Nus realisain gieus ch’èn persistents sut l’aspect economic, social ed ecologic, perquai che nus als imaginain ed als prendain per mauns da nov, perquai che las premissas èn optimalas tar nus e perquai che nus Svizras e Svizzers essan capabels da far quai.

L’enorma forza d’innovaziun da la Svizra è adattada, ensemen cun l’attracziun e la tradiziun dals gieus olimpics e paralimpics d’enviern, per realisar in’occurrenza che presta ina contribuziun per la societad che va lunsch sur il temp dals gieus e sur il sport ora, cun sia organisaziun e realisaziun persistenta.  

Grazia al lung temp da projectaziun e planisaziun pudain nus al medem temp integrar en la planisaziun strategica cun in patratgar persistent las sfidas ed ils svilups actuals sco la digitalisaziun e l’intelligenza artifiziala, las finanzas, il svilup demografic, la midada en il sectur d’energia u la midada dal clima. La realisaziun da gieus olimpics e paralimpics d’enviern èn uschia ina funtauna d’impuls. En quest connex ans stuain nus orientar a nossas atgnas metodas innovativas, dentant era a Brisbane 2032, nua ch’ins ha furmà partenadis tranter la regenza, l’economia ed ils lieus da las occurrenzas, per realisar projects da protecziun dal clima per la promoziun dad energias regenerablas e la reducziun dad emissiuns da CO2.

Gieus d’enviern decentrals signifitgeschan era: spargnar resursas. Cun in tal access pudain nus far quint cun las infrastructuras existentas. Quai munta d’ina vart dapli persistenza ecologica e da l’autra vart custs totals pli bass; e quai munta oravant tut ch’il maun public sto metter a disposiziun meds finanzials mo da maniera limitada. Per mussar che la Svizra vegn gia a disponer da l’infrastructura necessaria enfin 2038, basta in’egliada al decenni actual: dapi il 2023 han lieu en Svizra numerus eveniments da sport da relevanza globala, tranter auter campiunadis mundials ed europeics en 10 da 14 disciplinas olimpicas d’enviern. Ultra da quai ha Losanna ospità cun success ils Winter Youth Olympic Games il 2020. La Svizra è uschia sa posiziunada ils onns 20 sco vair “World Winter Sports Hub” sin la tribuna internaziunala. Era independentamain da grondas occurrenzas, ha la Svizra investì bler en l’infrastructura da sport. Plinavant ha il COI renunzià a prescripziuns en connex cun capacitads dd aspectaturs. Ina candidatura svizra pussaivla persequitass cun consequenza quest princip da redimensiunar; adequat als pitschens spazis geografics caracterisads da las meglras colliaziuns dal trafic public dal mund che contribueschan era a gieus cun paucas emissiuns.